Næringsfondet i Vik, frist 1. november

Har du ei god idé for utvikling av bedrift, bygda eller landbruket i Vik? Då kan du søkje støtte frå Vik kommune sitt næringsfond innan 1. november. Neste søknadsrunde vert i mai 2026, med behandling og utbetaling av midlar i juni 2026.

Gjennom næringsfondet gjev kommunen tilskot til tiltak som skapar nye arbeidsplassar, tryggjer eksisterande verksemder, aukar produksjon i landbruket eller bidreg til bulyst og omdømebygging i bygdene. Midlane kjem frå kraftfondet, inntekter frå vasskrafta i kommunen, og skal nyttast til å fremje næringsutvikling i Vik.

Det finst fleire typar støtteordningar:

• Oppstarts- og opplæringstilskot: for nye verksemder, kurs og kompetanseheving, lærlingar og traineear.

• Prosjekttilskot: for utvikling, investeringar og produktutvikling i eksisterande næringsliv.

• Bygdeutvikling og omdømebygging: for arrangement og tiltak som styrkjer bulyst og samhald.

• Landbrukstilskot: for prosjekt og investeringar i jordbruk, frukt, bær, skog og økologisk drift.

Søknader vert sende inn digitalt på www.regionalforvaltning.no. For landbrukstiltak skal søknaden sendast til postmottak@vik.kommune.no.

Ein god søknad bør innehalde skildring av tiltaket, budsjett, finansieringsplan og plan for gjennomføring. Kommunen legg vekt på tiltak som skapar arbeidsplassar, gir ringverknader lokalt, har innovasjonsverdi og tek omsyn til klima og miljø.

Les meir om ordninga og retningslinjene på vik.kommune.no.

Har du spørsmål om næringsfondet så er det berre å ta kontakt med Karoline Myklebust på karoline@sognnaring.no

Har du spørsmål om søknad til landbrukstiltak tar du kontakt med Veronika Seim Bech på veronika.seim.bech@vik.kommune.no

Foto: Bjoertvedt / Wikimedia Commons / CC BY-SA 4.0