Strategi for Sogn Næring 2020 - 2025

Vedteke i styremøte 01.04.2020. Oppdatert i styremøte 09.06.2021.

Om strategidokumentet

Dette strategidokumentet skal vere retningsgivande for arbeidet til Sogn Næring fram til 2025 og er det overordna styringsdokumentet til selskapet. Dokumentet viser til selskapet sine visjonar og verdiar, overordna mål og strategiske satsingsområder.

Visjon og verdiar

Sogn Næring har over fleire år vore med å bidrege til at Sogndal er blitt eit sterkt regionsenter. Skaparlyst og god livskvalitet kjenneteiknar samfunnet. Vi skal fortsette å bidra til dette. Samtidig er samfunnet i endring, med ny teknologi, digitalisering og klimaendringar som viktige drivarar. Sogn Næring skal legge til rette for at næringslivet tek i bruk ny kunnskap og kompetanse, og bidreg til ei berekraftig utvikling for ei grøn framtid. Dette vil gi livskvalitet for innbyggarane og sikre attraktivitet for regionen som bu- og arbeidsmarknad. Slik blir vi best på næringsutvikling i Vestland.

Verdiane våre er initiativ, handlekraft og samspel. Sogn Næring sitt arbeid skal vere kjenneteikna av at me tek initiativ ved å inspirere og legge til rette for utvikling, nye løysingar, samarbeid og ny kunnskap. Vi skal vere handlekraftige ved å vere lett tilgjengelege og kunne mobilisere raskt når det trengs. Gode resultat blir til gjennom samarbeid med våre mange samarbeidspartnarar, og samspel er difor ein viktig verdi for selskapet.

“Sogn Næring skal være best på næringsutvikling i Vestland”

Overordnet mål og innsatsområder

Strategien skisserer tre overordna mål for selskapet sitt arbeid i strategiperioden: Det er konkretisert tre innsatsområde per overordna mål. Desse innsatsområda er dei strategiske grep og aktivitetar selskapet skal utføre for å nå dei overordna måla.

Arbeidsmåte og samhandling med andre

Kommunane vi har oppdrag i har eit variert næringsliv, med verksemder i mange storleikar og bransjar. For vidare vekst og utvikling er det naudsynt at tal på arbeidsplassar aukar. Dette skal me gjere gjennom følgjande innsatsområde:

Gründertenester. Sogn Næring skal bidra til at det er enkelt å starte bedrift . Selskapet skal ha tilgjengelege kontorfasilitetar for gründerar og etablert næringsliv ulike plassar i kommunane. Gjennom eit aktivt nettverk, rådgjeving, mentorar, faglege- og sosiale arrangement, kontorfasilitetar og møterom skal me bidra til fellesskap, samarbeid og nettverksbygging for oppstartsbedrifter, og mellom nye og etablerte bedrifter.

Bedriftsutvikling. Vi skal arbeide målretta med etablerte bedrifter som ynskjer å utvikle verksemda si. Selskapet skal bidra med kompetanse på forretningsutvikling, finansiering og kapitaltilgang. Tiltak som fører til auka samarbeid mellom bedrifter og tiltak med stort arbeidsplasspotensiale skal prioriterast.

Nettverk og kompetanseutvikling. Sogn Næring skal etablere arenaer der næringsliv kan møtes for å blir kjent, lære og finne samarbeidspartnarar. Utveksling av ny kunnskap og erfaringar gjennom temasamlingar, studieturar og strategisk eller kommersielt samarbeid vil styrke bedriftene si konkurransekraft. Vi skal legge til rette for kurs for næringslivet som er viktige for vidare utvikling av bransjar og enkeltbedrifter. Vi vil arbeide for at vidaregåande skular og høgskule utviklar sine tilbod i tråd med næringslivet sine behov.

Regional utvikling for verdiskaping og attraktivitet

Næringslivet kjenner ikkje kommunegrenser. Å sjå heile regionen som ein felles bu- og arbeidsmarknad vil vere viktig for vidare utvikling av næringslivet og for å utnytte det samla potensialet i regionen. Me vil rette innsatsen mot følgjande innsatsområde:

Profil og merkevare. Sogn har samla ein variert arbeidsmarknad, og i åra som kjem vil det vere ein kamp for å sikre seg dei beste hovuda. Sogn Næring skal vere med å skape ein tydeleg profil for Sogndal og Sogn, og jobbe med synleggjering av stadlege kvalitetar. Å arbeide med å profilere Sogn som ein god plass å bu, arbeide og drive næring vil vere viktig for å sikre rett arbeidskraft til regionen.

Sikre regionalt viktige offentlege arbeidsplassar. Dei offentlege arbeidsplassane bidreg til eit variert arbeidsmarknad i heile regionen. Å sikre regional slagkraft i møte med auka konkurranse om arbeidsplassar blir viktigare framover. Selskapet skal følgje med på endringsprosessar i dei store offentlege verksemdene, støtte opp under politikarane sitt arbeid og mobilisere næringsliv for å sikre eksisterande verksemder samt jobbe for nye.

Bedriftssamarbeid i regionen. Utviklinga innan digitalisering, behov for stadig ny kompetanse og tempoet på informasjon som skal handterast gjer det naudsynt med auka delingskultur og samhandling. Å bidra til auka samarbeid mellom næringslivet i Sogn vil difor vere viktig for selskapet. Å styrke og vidareutvikle næringshageprogrammet i Sognefjorden Næringshage som eit godt verktøy for bedriftene i Sogn vil vere viktig for å oppnå dette.

Bidra til ei berekraftig utviklingegional utvikling

Sogn Næring skal bidra til å forsterke regionen sine komparative fortrinn og skape framtidsretta arbeidsplassar som er sosialt, økonomisk og miljømessig berekraftige. Dette skal gjerast gjennom følgjande innsatsområde:

FNs berekraftsmål. FNs berekraftsmål inneber mellom anna at framtidig vekst og nye arbeidsplassar må skje gjennom utvikling av produkt og tenester som kan bidra til reduserte klimagassutslepp og miljøbelasting. Sogn Næring skal bidra til at næringslivet ser endringar knytt til klima og miljø som ei moglegheit for innovasjon og nyskaping. Dette skal vi til dømes gjere gjennom kurs og temasamlingar. I møte med enkeltbedrifter vil vi inspirere til utprøving av nye, grøne forretningsmodellar som baserer seg på ny teknologi og sirkulær økonomi.

Nytte naturgjevne fortrinn. Ein stor del av arbeidsplassane i Sogn er knytt til regionen sine naturgjevne føresetnadar. Dette gjeld mellom anna lokal produksjon og foredling av naturresursar, reiselivsnæringa og fornybar energiproduksjon. Arbeidsplasspotensialet er stort, samtidig som desse næringane gjer det mogleg å leve grøne og bærekraftige liv. Vi skal auka samhandlinga med Visit Sognefjord slik at ein sikrar eit godt tilbod til aktivitetsnæringa der fleire aktørar utviklar produkta sine. Innan lokal produksjon og foredling av naturresursar og fornyar energiproduksjon skal me kartlegge utviklingspotensialet, og inspirere og initiere til prosjekt.

Ta i bruk ny kunnskap, teknologi og digitalisering.

Ny kunnskap og innovasjon er viktig for å skape framtidas bedrifter og trygge arbeidsplassar i regionen. Å styrke utviklingsmiljøet på Campus Sogndal vil vere viktig for å kunne kople lokale forsking- og utviklingsmiljø med innovasjons- og utviklingsarbeid i bedrifter og offentlege verksemder i regionen. Gjennom sekretariatsrolla for eigargruppa Campus skal vi bidra til å styrke samhandlinga mellom utviklingsaktørane på Campus. Åra som kjem vil vere sterkt prega av nye og til dels banebrytande teknologiske endringar. Evna til å vere i forkant av denne utviklinga vil truleg kunne gje sterke konkurransefortrinn. Sogn Næring skal gjennom til dømes kurs og temasamlingar bidra med kunnskap om teknologi og digitalisering som viktige drivarar framover for næringslivet.

Arbeidsmåte og samhandling med andre

For å nå måla i strategien er målretta og god samhandling med andre aktørar essensielt. Næringsliv, verkemiddelapparatet, Sogndal kommune, kommunane elles i Sogn og Vestland fylkeskommune er særskilt viktige.

Sogn Næring skal kjenne næringslivet sine behov godt. Gjennom jamleg kontakt med næringsorganisasjonar og enkeltbedrifter skal vi ha god kunnskap om utviklingsbehov. Dette er naudsynt for å nå måla i strategien. Vi skal også vere den naturlege koplinga mellom næringsliv og kommunen, og bidra til at næringslivet sine behov er godt kjent, til dømes i arealplanprosessar.

Kommunane er selskapet sine viktigaste oppdragsgjevarar, og viktige samarbeidspartnarar. God kontakt mot kommunane er viktig for å ha innsikt i planprosessar, sikre godt samarbeid om utviklingsprosjekt knytt til landbruk og prosjekt i skjeringsfeltet mellom nærings- og samfunnsutvikling.

For å sikre regional utvikling for verdiskaping og attraktivitet er tett og godt samarbeid med dei andre kommunane i regionen viktig. Vi skal vere ein pådrivar for møter mellom næringssjefane i regionen, og jobbe aktivt for samarbeidsprosjekt der det er ynskjeleg og har verdi. Fylkeskommunen som regional utviklingsaktør er gjennom formalisert partnerskapsavtale ein viktig samarbeidspartner. Å knyte seg tett opp mot strategiane til fylkeskommunen vil vere viktig.

Tett dialog og kontakt med verkemiddelapparatet er naudsynt for å kunne bistå næringslivet i utviklingsprosjekt. God innsikt i verkemidla og arbeidsmåtane til aktørane vil sikre bedriftene gjennomslag i søknadsprosessar etc. Vidare er samhandling viktig for å sikre godt samarbeid og ein heilskapleg inngang til utviklingsprosjekt på tvers av næringar og fagområde.

For å sikre fornying og kompetanseheving i næringslivet er utdanning- og forskingsinstitusjonane i regionen viktige. Vi skal knyte oss til aktuelle satsingar og mobilisere næringslivet til å nytte seg av desse. Dette fordrar god kjennskap og kontakt med dei aktuelle institusjonane.

Metode

Sogn Næring sitt arbeid vil spenne frå det å inspirere gjennom ulike arrangement til å vere støttespelar i eit utviklingsprosjekt i ei bedrift. Vi skal både sette dagsorden vere pådrivar og initiere til prosjekt, samt fasilitere og koordinere i implementeringa av eit prosjekt. Selskapet si rolle vil vere størst i den første fasen, når ein skal inspirere til aktivitet. Rolla og tidsbruken vil bli mindre som pådrivar og støttespelar i konkrete prosjekt.

Organisasjon

Sogn Næring skal vere ein attraktiv arbeidsgjevar der medarbeidarar trivst og har gode høve til å utvikle seg. Det er ei målsetjing at organisasjonen er dynamisk og raskt kan tilpasse seg nye oppgåver, rammevilkår eller arbeidsformer.

Det er mange verkemiddelaktørar i Norge og gjennomgang av desse har synt at landskapet er uoversiktleg. Sogn Næring ønskjer å bidra til at næringslivet og andre interessentar får ei saumlaus oppleving av dei offentglege verkemidla, og skal i framtida søke samarbeid med andre i ulike former får å oppnå dette.

Arbeidet med næringshageprogrammet til Siva og Fylkeskommunen skal styrkast og selskapet skal ha ein tydelegare rolle og eigarskap til programmet.

Kommunikasjon

Sogn Næring skal vere lett tilgjengelege for etablert næringsliv og gründerar. Det er difor viktig å kommunisere godt ut kva tenester me kan tilby. Samtidig skal me framsnakke næringslivet i Sogn, og vise dei gode historiane. Vi skal også synleggjere mogelegheitene som ligg i bruk av verkemiddelapparat og syte føre at næringslivet får relevant offentleg informasjon, t.d. om planprosessar. Dette skal me gjere gjennom å publisere månadlege nyheitsbrev, ha oppslag på Facebook og LinkedIn fleire gangar i veka og vere synlege på relevante arrangement. Selskapet skal publisere årsmelding for opent vise fram kva det blir jobba med i selskapet.